العام الأول في كلية العلوم 🔬💉

🔅 السلام عليكم و رحمة الله و بركاته 🔆

💙🌿 ما زلتُ حيّاً في مكانٍ ما، وأَعرفُ ما أُريدُ 🌿💙

 هذه التدوينه كتبتها لكم و أرجوا ان تستفيدوا منها و التي تخص طالبات المقبولات بكلية العلوم في جامعة الإمام عبد الرحمن بن فيصل سأتحدث لكن بشكل عام عن كلية العلوم و كلما يخصها من مواد للعام الاول حتى تكون لديكم معلومات مسبقة عن الكلية . 

المستوى الثالث - ترم واحد فقط تحضيري لكلية العلوم - 

بالنسبة لكلية العلوم فيها انظمة و تغيرات كثيرة و تختلف اختلاف تام عن التحضيري من ناحية الدوام بيكون خفيف و ممتع و الضغط اقل عنه . . حسب جدولك راح تختلف الاوقات من شعبة الى اخرى لكن الدوام بشكل عام من 8 الى 2:10 الظهر  ,, في اول اسبوع صار فيه يوم تهيئة لتذكير بمستجدات الكلية و كل ما طرى عليها من تغيير , اول اسبوع ما يكون فيه دوام ( يكون لمشاكل التسجيل و يبدأ الدوام الفعلي ثاني اسبوع دراسة ) 
بتكلم اول شيء عن التسجيل المواد ,, تسجيل المواد راح يتحدد لكم يوم معين الى مستوى 3 لتسجيل المواد و غالبا بيكون لكم شعب محددة تختاروا شعبة معينة - مثل التحضيري -  
بالنسبة الى الكتب , مو نفس التحضيري الكلية ما راح توفر جميع الكتب . . ممكن يوفروا الكتب العامه او الكالكولس و البعض يتوفر ك استعارة - الاستعارة تكون مبنى علوم 5 الدور الثالث اتوقع , تاخذين الكتاب الي تبيه و توقعي و نهاية الترم تسلميه للكلية ( عندي الكتب بنسخة الكترونية ) 

# مواد الترم الاول 

4 مواد كل مادة لها اربع درجات داخله في المعدل (   4Credit ) 
الترم خفيف يعتبر و المواد قليله و سهل ترفعوا معدلكم فيه 

1/ التفاضل و التكامل - Calculus 

المادة ذي بالذات ما اقدر اصنفها اذا كانت سهلة او صعبة بمعنى تعتمد اعتماد كبير على الطالبة , كثير اشتكى من صعبوتها و البعض العكس ؛ اول ترم تدرسوا التفاضل و الترم الثاني تدرسوا تكامل - على حسب تخصصكم - الافضل انك تدرسيها عند دكتورة تعرف تشرح , بالنسبة ليي سجلت عند دكتورة . مريم الدوسري - تعتبر كويسة لكن كانت سريعة جدا في الشرح , تتعاون مع الطالبة الي تشارك معها حتى لو كانت ناقصة بالدرجات و اذكر نهاية السنة اعطتنا اختبار تحسين لدرجتنا و الاختبارات تتدرج من سهلة الى صعبة , المادة اربع ساعات في الاسبوع + " ساعة لحل الوورك شيت - اخذتها مع م.ع مشنية " ( اختبارتها نفس اوراق الوورك شيت 👌 ) بالاضافة كان فيها موقع اسمه ( My labplus ) اشتريت كود ب 190 ريال , عشان اقدر احل الواجبات و اقدر اذاكر بالنسخة الالكترونية ( عليهم تقريبا 15%) . 

**صور للكتاب -

2/ الكيمياء العامة - General Chemistry 

هذه الماده تعتمد على اساسياتك بالكيمياء يعني لو كنتي شاطرة بالثانوية راح تحسي انها سهلة و ممتعة في نفس الوقت و المادة لها جزئين : 

الجزء الاول ( النظري) / عليه 70 % - درست عند د.عمر السعيدي " تونسي" في البداية كان شرحه تمام و يحاول انه يوصل لك المعلومة بشكل جيد و يعيد كذا مره لو مافهمنا بس الصراحة كون انه المادة بالانقلش و لهجته تميل الى الفرنسية فبعض الاحيان ما كنا نستوعب بعض الفقرات و اقدر اقول انه كان متعاون معنا بنسبة قليلة و يساعد بالدرجات.

 * الاختبارات : فيه كويز اون لاين على البلاك بورد - 10 درجات + اختبارين اعمال سنة كل اختبار من 10 درجات . 

و الفاينل من 40 درجة ( من ناحية التصحيح كل دكتور يختلف عن الثاني , يعني مو شرط يكون كل الدكاترة توزع درجات البنات البعض يكون نظامي ) 

الجزء الثاني ( العملي )  / عليه 30% - اول الترم درست عند م . ع فاطمة العمري شرحه كويس بعدين غيروها الى م .ع امينة المرشد بصراحة هالمس جداً متعاونة و كانت كثير تحاول انها تساعدنا سواء في طريقة الشرح او حتى و احنا نسوي العملي كانت دايما حريصة انه ما نطلع من المعمل الا واحنا فاهمين التجارب و بالاضافة كانت تطلب منا انه نكتب تقارير بعد كل معمل . 

** صورة للكتب - يفضل انك تذاكري من النسخة الالكترونية 

3/ الاحياء العامة - General Biology 

 دي المادة جداً ممتعة لكن دسمة شوي و تحتوي على جزئين : 

الجزء الاول ( النظري) / عليه 70 % - درست عند د. منيرة الجفعري , اتعب و اني اقول شقد هالدكتورة تعرف تشرح , بصراحة احسها تشرح من قلب و ماعندها مانع انها تعيد الشرح اكثر من مرة و نظراً لانه المادة بالانقلش كانت تشرح عربي و انقلش مع بعض ( الاكسنت ممتاز 👌) من بداية الترم اعطتنا خطة للمقرر و كيف توزيع الدرجات بالاضافة لوجود كويزات " كل كويز عليه درجتين " + فيه تاسك اما فردي او جماعي , بالنسبة للاختبارات ما كانت صعبة عادة تجي رؤوس اقلام .

الجزء الثاني ( العملي )  / عليه 30% - درست عند م.ع كوثر النهدي , طبعا الكلاس يكون مقسم الى قسمين على حسب الاسماء و القسم الثاني درس عند م.ع لولوه ( على كلامهم انها كويسة ) - مس كوثر كانت شديدة شوي ما تحب احد يتكلم في المحاضرة او يستخدم الجوال و شرحها كان ممتاز , في كل معمل كان نلبس لاب كوت و نسوي تجارب كل اسبوع يختلف عن الي قبله و الاختبارات كانت تحدد لنا الاشياء المهمة . 

*صورة للكتاب -

4/ الفيزياء العامة - General Physical 

الجزء الاول ( النظري) / عليه 70 % - درست عند د. غسان - جديد في الجامعة -  و شرحه ممتاز كان يشرح بالعربي و يجيب امثلة عشان نفهم و بالنسبة للاختبارات تعتبر نفس الي في المحاضرات وقليل لو جابوا افكار جديدة 

( ذاكرت من السلايدات لانها شاملة ) . 

* الاختبارات : في كويزات اون لاين مو نفس الشعب الثانية كانوا يختبروا اختبار ورقي . 

اعمال السنة - اختبارين كل اختبار عليه 10 درجات . 

الفاينل - 40 درجة و كله تصحيح الي . 

الجزء الثاني ( العملي )  / عليه 30% - درست عند م.ع نجلاء الشمري - ما تحب تشرح بالانقلش تقول انها ما تعرف توصل المعلومة الا بالعربي بس المصطلحات كانت تقولها بالانقلش عشان ما تتورطين في الاختبار , كنا كل معمل نسوي تجارب و نطبع  التقارير و نسلمها في نفس اليوم و ناخذ على كل تجربة درجتين الى نهاية الترم المفترض يكون عندك 20 درجة وباقي الدرجات للفاينل ( طبعاً في الفاينل كل المسات بيكونوا متعاونين معاكم ) 

* ما يحتاج تلبسوا لاب كوت في معمل الفيزياء .

🍁وبكذا انتهى اول ترم ولله الحمد 🍁

بعد الترم التحضيري في كلية العلوم يجي وقت اختياراحد التخصصات الاربعة 
( رياضيات / الاحياء / الفيزياء / الكيمياء ) 
طبعاً الكلية فتحت تخصصات جديدة و تخدم سوق العمل . 
بالنسبة الى تسجيل المواد - يختلف عن قبل - الكلية راح تنزل الجداول الى جميع المستويات من 4 و فوق جداول ترتبوا الى انفسكم بالاوقات الي هم محددينها بالجدول و ممكن يصير عندكم يوم اوف 😂 

الحمدلله قُبلت في تخصص الكيمياء 💙

في تخصص الكيمياء والتخصصات الاخرى ندرس مواد عامة ك تاسيس لتخصص - لمدة سنة و نص - و فيه مواد مشتركة بين التخصصات مثل الكالكولس و الاحصاء التطبيقي و مواد ثانية عامه ✨
 بعدها نختاراحد التخصصات الفرعية , بالنسبة الى الكيمياء يوجد فقط مجالين ( كيمياء عامه او كيمياء تطبيقية )

# مواد الترم الثاني 

1/ التفاضل و التكامل - Calculus  

الي تخصصوا كيمياء / الفيزياء / الرياضيات - يدرسوا الترم الثاني نفس الكتاب و لكن الجزء المتبقي منه , ايضا صارت في تغيرات عن الترم الاول بمعنى انه كل المادة تدرسيها عند دكتور واحد , درست عند د. حسام ؛ من وجهة نظري انه شرحه كويس بس يعطيك النقاط الاساسية في المحاضرة و يحتاج منك انك تذاكري اول باول و كان دايما يذكرنا انه هاذي المادة الوحيدة الي تحتاج منك جهد شخصي الدكتور مستحيل يغطي كل افكار المنهج لدرجة في الاختبارات القصيرة احيانا نكون منصدمين من بعض الاسئلة كون انه الافكار تختلف , ف نصيحة ذاكروا من الكتاب واطلِلعوا على اسئلته و بعدين ارجعوا للسلايدات . 

* صعب احدد لك ِ الدكتور/ة الشين من الزين لانه كثير نسمع انه الدكتور الفلاني كويس بس نلاقي الطالبة تعثرت في المادة و ما قدرت تعديها ف من البداية خلي بدايتك صح اكيد راح تكون نهايتك صح 👌 . 

- نفس صورة الكتب - 

2/ الكيمياء العامة - General Chemistry  

تحدثت مسبقاً عن طبيعة المادة . 

الجزء الاول ( النظري) / عليه 70 % - درست عند د. نور الدين , ما يحب يشرح الجزء الي يحتوي على كلام اغلب المحاضرات يشرح المسائل و يحاول يطورنا و يساعدنا عشان نحل المسائل الصعبة , المحاضرة كلمة ممتعة قليلة بحقها دايما يحاول يغير من جو المحاضرة و يفضل انها ما تكون رسمية كثير , يساعد لحد كبير في الدرجات و يعطينا اختبارات مماثلة الى الاختبار الي بيجي و بالاضافة عطانا نسخ من الاختبارات السنوات الماضية و ترجمناها ( درجات اضافية ) , سهل تجيبوا درجات عالية .. و بالنسبة له لو في الاختبار لو حليتوا المسائل كويس عادي يعطيكم درجات اضافية 😍 كل الشعبة نحجت عنده بدرجات حليوه 😍💖

الجزء الثاني ( العملي )  / عليه 30% - بالنسبة للجزء العملي ماكان نفس الترم الاول , درست عند م.ع مها العقيل و م.ع عبير المهنا كل اسبوع كان على مس تشرح التجارب و بعدها نطبق عملي ( يكون شغل جماعي ) 

- على كل معمل ناخذ درجات للحضور و التطبيق .

* الاختبارات : فيه شيت اختياري لكل المقرر + في الفاينل العملي تعطيك المس ورقة فيها اسم التجربة و انتي تطبقي . 

- نفس صورة الكتب - 
** صورة للمعمل 

3/ الكيمياء الغير عضوية - Inorganic Chemistry 

بشكل عام المادة كلها تشرح لك الجدول الدوري بالتفصيل و كل عنصر والمعلومات الي تخصه و مكونة من جزئين : 

الجزء الاول ( النظري) / عليه 70 % - درست عند د. انور واصل , الدكتور الي ما عندي مشكلة اني اسجل عنده مره ثانية من كثر ما انه كويس و يشرح بطريقة ممتازة و ممتعة , عادي يعيد لك الشرح مره ثانية و دايما يجيب امثلة تساعدك في المذاكرة . 

* الاختبارات : فيه كويز اون لاين عليه 10 درجات + اعمال السنة كل اختبار عليه 10 درجات 

- د. انور يحب يشوف اذا الطالبة فاهمه او لا عشان كذا ممكن تكون معظم اختبارته مقالية - 

مثل ما ذكرت سابقاً المادة كلها عن الجدول الدوري , عارفة انه فيه معادلة كثيرة مطالبة انك تحفظيهم الي عليك تفكري لك بطريقة كيف تذاكريهم بحيث ما تنسيهم و اذكر في الفاينل الدكتور جاب لنا جدول نكتب الجدول الدوري ( اشهر العناصر الموجوده فيه )  

الجزء الثاني ( العملي )  / عليه 30% - نفس الكيمياء العامة تدرسي عند اكثر من مس , درست عند م.ع امينه و م.ع فاطمة تكلمت عنهم مسبقاً . 

4/ اللغة الانجليزية للتواصل العلمي  - English for Communication 

المادة تعتبر سهلة كون انه احنا تونا مخلصين من التحضيري و بصراحة هالمادة ما كنا نسوي اشياء كثيرة فيها يعني مو نفس باقي المواد و حتى لو المس كانت تبي تسوي شي كان قليل الي يتفاعل معها , كان عندنا محاضرة ساعة يوم الاثنين و ساعتين الخميس , درست عند م. فاسنثي " هندية" و يعتبر اغلب الطاقم التدريسي نفس الي درستني بمستوى التدريس . 

بالنسبة للاختبارات : الكويزات نسخ لصق من الكتاب + اختبار واحد ميد ترم عليه 20 درجة . 

قبل الفاينل بيكون اختبار Listening عليه 10% و الفاينل عليه 40% . 

- صورة للكتاب 

  5/ السلامة في المختبر - Safety in lab 

المادة اغلبها نظري و طرق  الوقاية من الحوادث الي ممكن تصير في المعمل , المادة خفيفة و بتحسي انها ممتعة لو اخترتي مس تعرف تشرح كويس , درست عند م.ع الهام الخليفي -  المس دي عسل و تهبل حاولي انك تركزين معها في الشرح تقول نقاط مهمه غالبا ما تكون موجودة في السلايدات او كمعلومة ممكن تفيدك كونك كيميائية , محاضرة وحدة في الاسبوع و معمل واحد يتطلب انك تلبسي لاب كوت باقي المحاضرات كلها نظري و المادة سهلة جدا و سهل تاخذي A+ . 
سوينا معرض في الكلية عن السفتي , كان عليه 15 درجة نشاط  تضاف لنا .

. . نصيحة . . 

1- اخذي معلومات سابقة عن التخصص الي تبي تدرسيه , اسالي طالبات درسوا من قبل , و الافضل 
من هذا استخيري قبل لا تختاري . 

2- لازم يكون عندك لاب كوت ( بالطو ) + نظارة حماية " لو كنتوا تلبسوا نظارة طبية ما تحتجوا تلبسوها "  . 

3- في الكوبي سنتر فيه ملازم للمواد الي فيها العملي و تقدروا تنسخوا المحاضرات منها . 

4- حاولي ما تراكمي عليك المحاضرات و ذاكري اول باول . 

 الكلية مو نفس ما سمعنا عنها انها سيئة , تغيرت بشكل جذري .. الدكاتره متعاونين و لو احد عنده مشكله يساعدوه , ما يقصرون مع احد . . اختاري الدكاتره الي تعرف تشرح عشان تستفيدي اكثر . . و الاهم لا تسمعي الى اي احد يقولوا انه المواد صعبة او الاختبارات ما تنحل .. كل شيء بالاجتهاد يصير . 

وبس اتمنى اني قدمت لكم شيء تستفيدوا منه و عذرا على الاطالة 💖

لو عندكم اي استفسار في خدمتكم 
حسابي بتويتر : 

https://twitter.com/msanr97